ახალო წელო

***

ახალო წელო,

ფიქრებით მწველო,

გთხოვ, რომ ცხოვრება

არ გაგვიძნელო.

მოგვშორდი, შხამო,

მოგვშორდი, გველო!

ახალო წელო,

ფიქრებით მწველო,

შენი სიკეთე თუმცა-კი მჯერა,

ყური დამიგდე, რასა გთხოვ ჯერა:

ვინაც არ იცის,

ასწავლე წერა;

მე უკეთესის

ჰანგების მღერა

მასწავლე, თორემ

დაგლოცავ ვერა.

გვიცოცხლე თავი,

გვიკურთხე მკლავი,

გვაშორე საქმე

ბილწი და შავი…

და მოგვეც ყველას

პირი და ზავი.

თუ არ მისმინო,

მოგიკვდეს თავი.

ვ. ფშაველა